Konkursi letrar “Gjergj Fishta” shpallen fituesit e kësaj gare me pjesmarrës nga gjithë hapësira mbarëkombëtare.

Nga Pirusti News

Viti i At’ Gjergj Fishtës ishte në fokusin e veprimtarive të Akademisë së Artit, Shkencës dhe Letrave “Mirdita”.

Në kuadër të vitit fishtjan në fillim të vitit u përcaktuan disa nisma, ndër to dhe konkursi poetik. Edhe pse jetojmë në një kohë të kushtëzuar nga Covid 19, asnjë nga aktivitetet nuk u pezulluan, por u realizuan sipas programit, ndonëse duke iu përshtatur situatës.

Pas njoftimit për hapjen e konkursit poetik u pa një interesim i madh i pendave poetike nga mbarë hapësira jonë kombëtare. Të gjitha poezitë janë të arrira dhe do shërbejnë si një buqetë e bukur në vitin e veçantë fishtjan.

 Juria është munduar të jetë sa më gjithëpërfshirëse, megjithatë gara është garë, e cila ka sjelle dhe fituesit e mëposhtëm:

Çmimi i parë: Lola Shehi-poezia Rrëfim

Çmimi i dytë: Farida Ramadani-poezia “Legjendat mallkojnë

Çmimi i tretë: Eltona Lakuriqi-poezia “Promemoria e Fishtës për familjen Prendushi dhe letra për sivëllezërit e tij françeskanë”

Çmimi i Karrierës: Qendresa Sadrijaj-poezia “Këmbim vetmie

Çmimi Vargu më i bukur fishtjan: Hysen Grajçevci-poeziaUnë i përvuajturi

Çmimi Akademisë Artit, Shkencës dhe Letrave “Mirdita” – Majlinda Shaqiri – poezia “Flet shpirti Pishtar

Çmimi i Inkurajues: Indira Avdyl Hoxha-poezia “Viti i Fishtës

Çmimi STIL: Angjelina Mena Nikolli-poezia “Lahuta jote nji përmendore

Çmimi GJETJE POETIKE: Llesh Ndoj-poezia “At Gjergj Fishta e Anton Çeta

Çmimi MESAZH: Liridon Cenaj-poezia “Hej ti ku je?

Poezia Fituese nga Lola Shehi:

 

RRËFIM

At Gjergj,

Në shtëpinë tënde,

Kam ardhë të rrëfehem

Krejt pa dashje,

Po kam mëkatuar At

Qënien më hyjnore ndër qeniet e gjalla

E kam marrë inat

 

E di At se ç`do më thuash,

Ta lexoj në sy

Bija ime

Inati është këshillues i keq

Ndaj mos e mbaj njat zemrës,

Mos i bëj konak

Inati bija ime,

Asht ma keq se dreq

 

Hajde bija ime,

Rr`fehu e çliroje shpirtin

Se zoti  asht i madh e di me falë

Veç amanet,

Fol ngadalë e  n`shqipe t`pastër

Se tej përtej m`a shpon ashtën shqipja e çalë

 

At Gjergj,

Të mërzita e të mora kohë

Ah sa vështirë e kam të rrëfehem

Mëkati im, është i një lloji të rrallë

Nuk dyshoj në mençurinë tënde madhëri

E ke marrë me mend pse po i vi vërdallë.

 

Më ndje o zot,

Se kam marrë inat  nënën time

Pse s`më solli në jetë pak më herët,

Vetëm dy ditë më parë

Do kishim pasur rastin ,

Datëlindjet  t`i festonim bashkë

O këtu në vendlindjen tënde,

O në rebelen time, Karbunarë

 

Të më recitoje ca vargje nga të tuat

Veshur me frakun e zi e me qaforen e bardhë

Shoqëruar me tinguj fyelli ,

Të këndoja një iso myzeqare

Ti me zë të plotë baritori,

E unë si thëllëzë me zë të parë

 

Në sofrën e datëlindjeve,

Nuk do vendosim qirinj me vitet tona

E ku na mjafton fryma të fikim gjithë ata qiri

Në sfond,

Dua një melodi që lazdron vjeshtën

Dy gota verë të kuqe,

Dhe ca të ëmbla poezi…

 

Ja pra At, t`u rrëfeva

Mëkatit tim mos i mbaj mëri

Ti je i gjërë e di me falë

Më fto të përgjërohem në datëlindjen tënde

Dhe unë mëkatarja e penduar

Fluturimthi do të vi.

Ju mund të lexoni edhe...

Lini nje koment

Shperndarje