Përgatiti: Aleksandër NDOJA
Në edicionin e sivjetshëm të “Këngës Magjike 2025”, një nga emrat që spikati për finesë, përmbajtje dhe interpretim artistik ishte Sabina Dona, vajza nga Rrësheni që me zërin e saj plot ndjenjë solli në skenë një histori të brendshme shpirtërore, të titulluar “Alo (Po të flet vetmia)”.
E diplomuar në Akademinë e Arteve të Tiranës, në qershor të këtij viti, në degën Kanto dhe Mësuesi Muzike, Sabina është një artiste e formuar me bazë profesionale solide dhe me një rrugëtim të gjatë në fushën e këngës elitare. Gjatë viteve, ajo ka marrë pjesë në dhjetëra aktivitete muzikore, duke u vlerësuar për zërin e pastër, shtrirjen vokale dhe aftësinë për të përçuar emocion me thjeshtësi dhe elegancë.
Në “Këngën Magjike”, Sabina dha një nga interpretimet më të veçanta të këtij edicioni, në një bashkëpunim artistik me Elios Shulin (ZODIAC) – autor i tekstit dhe muzikës – dhe me Aldo Markun, producent e miksues i njohur që i dha këngës një trajtë moderne dhe dinamike.
Klipi i realizuar nën regjinë e Aldon Lipes, i dha krijimit një dimension të ndjeshëm vizual, duke plotësuar tablonë emocionale të këngës.
“Alo (Po të flet vetmia)”
Në thelb, kënga është një monolog shpirtëror, një thirrje e fundit drejt dashurisë që po shuhet. Me fillimin “Alo… Nëse nuk po ma njeh zërin, jam unë…”, teksti e fut dëgjuesin menjëherë në një situatë intime, ku zëri i femrës është i dridhshëm mes kujtesës dhe mungesës.
Në vargjet “Thujani, unë po ik’ / Nga zemra jote…”, dëgjojmë një largim që nuk është dorëzim, por çlirim, një lamtumirë që lind nga vetëdija e një dashurie të njëanshme.
Refreni, “A vjen, me i marrë? / Ti këto lotë, a m’i merr zemër?”, është kulmi emocional i këngës, ku ndjesia e humbjes shndërrohet në forcë dhe dinjitet. Sabina, me interpretimin e saj të kontrolluar dhe njëherësh të brishtë, i jep zë shpirtit të një vajze që e ka përballuar dhimbjen pa e humbur vetveten.
Në fund, “Alo, po të flet vetmia…”, kthehet në metaforën më të fuqishme të krijimit, vetmia si bashkëbiseduese, si dëgjuesja e fundit kur dashuria hesht.
Një zë që premton gjatë
Performanca e Sabina Donës në këtë festival nuk është vetëm një sukses personal, por edhe një dëshmi se arti i vërtetë lind nga ndjeshmëria, përkushtimi dhe profesionalizmi.
Ajo po afirmon veten si një nga zërat më premtues të brezit të ri, që e lidh pasionin me teknikën dhe skenën me shpirtin.
Sabina Dona nuk është më thjesht “vajza nga Rrësheni” që këndon bukur, por një artiste që po ndërton me seriozitet profilin e saj në muzikën shqiptare, duke përfaqësuar me dinjitet jo vetëm Mirditën, por edhe shkollën e vërtetë të artit.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA