-Paraqitet dokumentari rreth jetës së tij; njëherit promovohet libri më i fundit me tregime “Burri pa këmishë” –
Matura 1972 e Gjimnazit Rrëshen mbetet ende në kujtesën e një qyteti edhe pse maturantët e atij viti tashmë janë me flokë të thinjura e ndonjë fatkeqësisht është ndarë nga jeta. Mbetet në kujtesë për faktin se, nëse për mbi 50 vite, nxënës nga ky gjimnaz u nderuan me gjashtë medalje të arta, katër prej tyre i përkasin pikërisht maturës 1972 e njëra prej tyre, është fituar nga maturanti Dedë Shkurti. Mbetet e rrallë në llojin e vet kjo mature, pasi mbi 95 përqind ndoqën shkollimet e larta; u bënë mjekë, inxhinierë, mësues, agronomë, që kanë dhënë aq shumë në fushat e tyre, por edhe si qytetarë të denjë të këtij vendi.
Një vit më pare, fituesi i medaljes së artë të atij viti ing. Dedë Shkurti u nda nga jeta në kulmin e prodhimtarisë intelektuale e kulturore, sot miq të shumtë të tij nga Tirana, Kukësi, Lezha, Kosova, Mirdita, familjarë e të afërm e “kthyen” Atë në qytetin e tij Rrëshen; ashtu të gjallë, të qeshur e plot sharm si dikur, por këtë rradhë përmes kujtimeve, fotografive dhe një dokumentari të posaçëm, përgatitur nga regjizori i mirënjohur Llesh Nikolla “Mjeshtër i Madh”, ndërsa Bashkia Mirditë i ka akorduar çertifikatën e mirënjohjes me motivacionin:
“Për kontribute të shquara si intelektual i spikatur i Mirditës, maturant i Medaljes së Artë, inxhinier me gjurmë të thella kudo ai punoi që nga Kukësi, ndërmarrjet e Mirditës apo në Tiranë, kontributor aktiv në politikën vendore e më tej, njeri i penës së maturuar si në analiza dhe krijimtarinë letrare, qëndrestar i paepur dhe humanist i idealit njerëzor”.
Ceremonia e akordimit të Mirënjohjes nga Bashkia Mirditë.
Ceremonia përkujtimore ka nisur një ora 11.00 në Qendrën Kulturore të Bashkisë Mirditë, pas homazheve në vendin e Tij të prehjes. Ceremonia është moderuar nga gazetari Gjergj Marku i cili ndër të tjera tha se “ka njerëz që me përmasën e tyre, i kalojnë portat e dyerve të një familje, lagjeje apo fshati. Me gjurmën e tyre që ata lënë bëhen pjesë e memories kolektive dhe udhërrëfyes për brezat”. Më tej të pranishmit ndoqën dokumentarin “Në vit pa Dedën” realizuar nga regjizori Llesh Nikolla dhe familja e tij.
Pasi autorët morën përgëzime me duartrokitje për dokumentarin i cili përcjell në detaje historikun e Dedë Shkurtit, është kaluar në ceremoninë e dhënies së çertifikatës së mirënjohjes nga Bashkia Mirditë.
Ne fjalën e tij përshëndetëse kryetari Bashkisë z. Ndrec Dedaj tha se siç e pamë edhe nga dokumentari Dedë Shkurti është shumë i arrirë në formatin e tij intelektual. Deda që në fëmijëri ka spikatur si nxënës, si gjimnazist i medaljes së artë, si student i talentuar, si një inxhinier i spikatur, por edhe si njeri dashamirës, shumë i shoqërueshëm, me humor të lezeçëm, me një intelekt shumë të zhvilluar. Për detaje nga jeta e Dedës padyshim do të flasin shokë e miq që e kanë njohur. Në pak raste që unë e kam takuar Dedën kam kuptuar se përballë kishe një njeri me shumë intelekt, shumë mendimtar i cili e përdorte fjalën ne mënyrë të përkryer. E donte Mirditën, i vlerësonte njerëzit këtu. Deda ka lënë pas një vepër letrare cilësore si në poezi dhe në prozë, por siç u informova Deda ka lënë dhe 1000 vargje në dorëshkrim. Deda vërtetë është ndarë nga jeta, por ka lënë pas histori shumë pozitive e të jashtëzakonshme, ka përfundur z. Dedaj.
Më tej janë ftuar djali i madh Erindi dhe Bardha, bashkëshortja e Dedës për të marrë çmimin e akorduar nga Bashkia Mirditë, çmim të cilin e ka dorëzuar kryetari i bashkisë z. Ndrec Dedaj.
“Burri pa këmishë” vepra letrare e Dedë Shkurtit, në optikën e kritikëve miq të Dedës.
Pjesë e aktivitetit të ditës së sotme ishte edhe promovimi i veprës letrare “Burri pa këmishë” botuar sëfundi me krijimtarinë e tij artistike. Siç ai është i njohur në rrethet letrare dhe artistikë në hapësirën mbarëkombëtare, Deda ishte një mjeshtër i spikatur i fjalës, poet dhe prozator i lexuar dhe i vlerësuar. Pikërisht në këtë aspekt miq të tij e kanë pasur mjaft të vështirë për të artikuluar atë çfar ndjenin përballë veprës së shkruar ndër vite nga Deda.
Siç u vlerësua nga të parnishmit, Deda filloi të shkruante që në universitet, por zyrtarisht u botua për herë të parë në vitin 2003, me vëllimin “Me zemrën u zura keq”. Krijimtaria e tij letrare vijoi pa ndërprerje, dhe u zgjerua gjatë periudhës së tij në Amerikë. Libri i tij i dytë doli në shtyp në vitin 2014. Vëllimi i tij i tretë, ‘A thua, vegim?!” u botua në Janar të vitit 2018.
Tregimet e përmbledhura në librin “Burri pa këmishë” u botua pas ndarjes nga jeta të tij, nën kujdesin e familjarëve, dhe miqve të tij. Ende vëllimi i mëparshëm u shkrua gjatë përiudhës 2017-2018 në një periudhë që luftonte me sëmindjen e rëndë, çka prezanton një vullnet të hekurt për të përcjellë atë çfar kishte akumuluar ndër vite. Deda ka qenë frekuent në rrjetet sociale por edhe në mediat televizive kombëtare e rajonale si për temat e sistemit automobilistik por edhe historisë së Mirditës, si dhe politikës dhe ekonomisë.
Në vitin 2014, Dedë Shkurti u nderua me çmimin “Mirënjohje” nga Ministria e Diasporës së Republikës së Kosovës për poezinë “Vunoi dhe Himara”.
Rreth librit “Burri pa këmishë” por edhe për krijimtarinë e tij më të gjerë kanë folur shkrimtari Besim Cengu, Dr i shkencave Nexhat Çoçaj, Poeti, Fejzi Murati, por edhe kolegë të tij si ing.Leonard Qyteza nga Shkodra, por edhe miku i tij që nga matura 1972, intelektuali dhe njeri i penës ing.Dod Pjetraj. Dod Pjetraj ka recituar edhe nje poezi te shkurter me autor mesuesin Preng C. Lleshi, kushtuar Dede Shkurtit.
Në fund e ka marrë fjalën Ndue Shkurti, vëllai i të ndjerit Dedë Shkurti, i cili në emër të familjes së madhe ka falenderuar të gjithë të pranishmit në sallë e jashtë saj, miq të Dedës.
Aleksandër Ndoja
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA