Aleksandër Ndoja
“Tirana Observer” 4 maj 2005
Epo që kemi problem me energjinë elektrike, kjo nuk ka diskutim. Por që për të zgjidhur këto probleme do të thërrisnim Skënderbeun, kjo nuk ishte parë e dëgjuar. Banorët e qytetit të Mamurrasit kanë vendosur që t’i japin disa funksione njëherësh statujës së Heroit, që ndodhet në qendër të qytetit.
Nuk dihet me saktësi se sa kohë ka kjo statujë në atë vend. Por në historinë e saj njihet periudha 1996 e deri në fillim të 97-tës, kur kjo statujë u eklipsua totalisht me një fotografi prej disa metrash të Rrapush Xhaferrit, president i njerës prej firmave piramidale. Sigurisht, pas kësaj ajo statujë e rimori shkëlqimin e saj.
Por ajo çfar mund të konstatohet lehtësisht në fotot e bëra pak ditë më parë, është funksioni që Heroi ynë kryen ende ndaj bashkombësve të vet. Në njërin prej brirëve të tij është vendosur një kabllo elektrik, i cili dërgon energji në anën tjetër të bllokut të pallateve, kur ajo mungon në atë anë. Por ama kur krahu tjetër mbetet në errësirë, sërish ky përcjellës dërgon energji në krahun e kundërt, por gjithnjë përmes brirëve të dhisë, në përkrenaren e Skënderbeut. Në foto duket edhe briri që është thyer, ndoshta për shkak të tërheqjes së kabllos.
Banorët kanë gjetur një mënyrë të rrallë për të përfituar energji. E duket se ata kanë harruar që ajo që bëjnë, është dhunim i Heroit Kombëtar. Në fakt, kjo mënyrë e të punuarit nuk është e rrallë për shqiptarët, të cilët edhe në raste të tjera jo të rralla, kanë vënë në përdorim të dyfishtë monumentet kombëtare.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA