– LLESHAJ Pashke (23.03.1924 – 6.08.1997), ndër tre mësueset e para në Mirditë, veprimtare për emancepimin e gruas –
Marrë nga Enciklopedia e MIRDITËS.
Pashkja lindi në Ulqin, bija e Kolë Ndue Preng Dushit nga Kaçinari i Mirditës,emigruar më parë në Prizren dhe pastaj në Ulqin. Mbaroi shkollën femërore në Ulqin. Martohet me Pjetër Prengën (Lleshaj) nga Proseku, oficer që kishte mbaruar Internatin e Burrelit, pastaj shkollën e mesme ushtarake në Tiranë dhe një shkollë ushtarake dyvjeçare në Itali (1942).
Shkolla fillore Prosek, e hapur në vitin 1945, pas dy vjetësh u nda në dy fuqi mësimore për shkak të numrit të madh të nxënësve dhe me vendim të Seksionit të Arsimit të Prefekturës së Shkodrës, Pashke Lleshaj u emërua mësuese e saj,(1947), krahas mësuesit ekzistues Pjetër Toma, duke u bërë kështu njëra ndër tre mësueset e para të Mirditës.
Pashkja vazhdoi me sukses të mësonte klasën e parë dhe të tretë dhe e përfundoi atë vit shkollor, edhe pse grupet e armatosura që luftonin kundër pushtetit komunist kishin filluar t’i kërcënonin edhe mësuesit. Në vitin që pasoi, grupet e armatosura i kërkuan Pashkes që të mos shkonte më në shkollë, ndryshe do ta vrisnin, por ajo nuk pranoi. Pas disa paralajmërimeve, me 25 prill 1948, i shkojnë Preng Lleshajt në shtëpi, e lidhin, ndërsa gruas Pashkes i qethin flokët. Në plan ishte ekzekutimi i tyre, por me ndërhyrjen e Preng Dodë Gjin Keqit u falet jeta.
Pas dy ditësh, në ato kushte mësuesja Pashke Lleshaj u paraqit në shkollë dhe vijoi mësimin. Por organet shtetërore i transferuan në qendrën industriale Rubik, ku u vendosën edhe me banim. Me ashpërsimin e luftës së klasave, për faktin se Prenga kishte qenë ushtarak në periudhën e fashizimit, u mohuan çdo punë intelektuale. Pashkja kaloi nga edukatore kopështi në shitëse buke apo kuzhiniere në NFP.
Pashke Lleshaj vdiq në Rubik dhe u varros pranë Kishës Katolike në afërsi të atij qyteti. Megjithëse është njëra nga tri mësueset e para të Mirditës, veprimtaria e saj arsimore dhe emancipuese ende nuk është vlerësuar.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA