Nga Aleksandër NDOJA, “Koha Jone” 01.12.2004
Ka qënë ora 12 e ditës së mërkurë të datës 1 dhjetor 2004, kur poeti i madh i Kosovës ka zbritur në qëndrën e qytetit të Rrëshenit. Vizita e tij e parë në këtë qytet, është në kuadrin e një aktiviteti me titull “Ditët e Ali Podrimes në qarkun e Lezhës” Ndërsa kureshtarë të shumtë ishin në pritje të Podrimes së përkthyer në 20 gjuhë të botës, perpara tyre shfaqet njeriu i thjeshtë jo vetëm në pamje por edhe në komunikim, i cili udhëtonte nga Kosova për në Mirditën që aq shumë kishte dije dhe informacion, por që kurrë nuk kishte mundur ta “prekte” atë.
Takimi parë është rezervuar në zyrën e krye bashkiakut z. Preng Toma. Në fjalën e mirseardhjes z. Toma tha se jam shumë i gëzuar që pres një nga korifejtë e letrave shqipe sic është Ali Podrimja. Ky i fundit u shpreh se e ndjej veten te lumtur që jam në Rrëshen. Këtu po shoh se ka diçka nga Kosova, këtu më vjen era Kosovë. Pas një kafeje mikpritje në këtë zyrë, Podrimja vijoi me një takim me intelektualët vëndas në sallën e prefekturës. Bardhok Pulaj, Ndue Dedaj, Viktor Gjikola dhe shumë njerëz të tjerë të artit e të kulturës vendase, kane zhvilluar një bashkëbisedim të ngrohtë me poetin Podrimja. Veçanërisht emocionues, ka qënë aktiviteti me këtë rast në sallën e madhe të qëndrës kulturore. Qindra qytetarë e nxënës shkollash kishin mbushur këtë sallë.
I konceptuar si aktivitet shumë dimensional, takimi me karakter njohës u shëndërrua në një spektakël të vërtetë. Drejtuesi i spektaklit z. Gjergj Marku, ftoi z. Podrimja për të four për poezinë e tij, për Kosovën dhe për çështjen kombëtare në përgjithësi. Ndërsa dhjetëra poezi të Ali Podrimes janë recituar nga nxënës të shkollës së mesme. Takimin e përshëndeti kryetari i qarkut z. Bardh Rica. Mjeshtiri i shquar i këngës burimorë mirditore z. Mark Gjoka me grupin e tij, me këngën hymn “Si vëndlindja jonë nuk ka”dhe me disa këngë të tjera për Kosovën u duartrokit gjatë nga të pranishmit.
Një përshtypje për vizitën tuaj të parë në Mirditë?
Unë jam tepër i lumtun që e pashë këtë pjesë të atdheut. Unë do ti lutsha kolegët e mi nga Tirana dhe nga gjithë Shqipëria, ketë cep verior të lirisë, ta vizitojnë ma shpesh. Arsyeja është se prania e krijuesve dhe artistëve nga kryeqendra, Tirana, do ti entuziasmonte krijuesit e Mirditës, qytetarët e Mirditës, për veprimtari të ma tutjeshme.
Ndonëse është hera e parë që e vizitoni Mirditën, ju thatë se e keni njohur më herët atë. Si e keni njohur Mirditën?
Unë Mirditën e kam njohur përmes babës tem. Ai ka qanë idhtar i Bajram Currit, i cili më ka spjegue gjer e gjatë për Mirditën. Baba jem shpesh ka udhtue përmes Mirditës gjer në Shkodër. Gjakova vendlindja jeme ka qenë e lidhur ngusht me Shkodrën, e ajo ma shumë i ka takue Shqipërisë se sa ish bashkësisë së Jugosllavisë. Mirpo një politikë e fëlliqte e ndërkombëtarëve bëri që edhe qyteti im të mbetet në një zonë gri. Por unë veten e kam ndjerë në Mirditë, si në ndonjë lagje të qytetit tim të Gjakovës.
Për sa ju keni dëgjuar e studiuar, ç’vënd zë Mirdita në historinë tonë kombëtare?
Mirdita në historinë tonë kombëtare zë një vënd të merituar. Mjafton të përmendim që në kohën e sundimit otoman Turqia shum pak ka shkelë në këto anë.
Ju u shfaqët si një njeri jo politik ndërsa në një studim të mirfilltë të poezisë tuaj, të veprimtarisë tuaj vihet re qartazi politika. Parë në këtë kontekst, si e mendoni zgjidhjen e çështjes sonë kombëtare?
Çështja jonë kombëtare do të zgjidhet atëherë kur ne të kuptojmë se në Europë duhet të shkojmë të integruar dhe jo copa-copa.
Njiheni si poet që keni lëvruar vetëm poezinë, ndësa së fundi shfaqeni me një libër stilistik. Pse ky ndryshim?
Mue më shqetson ç’do gjë që i bëhet me të padrejtë kombit tim, ndaj dhe reagoj shpesh ndaj padrejtësive që na ka ba Europa. Unë e shfrytëzoj edhe përmes poezisë ta shfaq atë mllefin tim, por edhe përmes tekstit diskursiv.
Pse i qëndroni idesë se poezia shqipe është moderne prej kohësh?
Duke lexuar Pjetër Bogdanin ka pa se as Ali Podrimja, as Ismail Kadare e as një shkrimtar në hapsirën Shqiptare nuk është rastësi. Ne kemi pasur një letërsi të madhe në shekullin e 16-të. Pra ne duhet që të studiojmë të kaluarën tonë që ta duem të ardhmen.
Ka më padrejtësi ndaj kombit shqiptar?
Duket që nuk ka. Padrejtësitë mund ti kryejmë ne ndaj vetvetes.
Rrëshen. 01.12.04
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA