Stina e pranverës dhe e ajo e fillimverës shënon edhe përvjetorë të shumtë të rënies heroike të djemve të Kosovës, të cilët nuk kursyen asgje e deri dhe jetën, që kjo pjesë e kombit të fitonte lirinë. E ndërsa pak ditë më parë u përkujtua 20 vjetori i i rënies heroike të 22 vjeçarit Kol Ndrec Mirdita, nga Ranoci i Klinës, por me origjinë të hershme nga Spaçi i Mirditës dy ditë më pas, në Prizren përkujtohet 20 vjetori i rënies së dy dëshmorëve, kushërinjve Ylber dhe Albrim Fana 20 e 19 vjeç nga Vërnica e Prizrenit në kufi me Kukësin, por me origjinë të hershme nga Fani i Mirditës. Të gjithë të rënët e vitit 1998 janë pararendës të asaj lufte të lavdishme që do të merrte hov të fuqishëm pak muaj me vonë, pasi ranë në luftë në aksione për transportimin e armëve nga Shqipëria, për në vatrat e luftës fillimisht në Drenicë, e më pas në çdo hapësirë të Kosovës së okupuar prej 100 vitesh.
Ceremonia në përkujtim të dy luftëtarëve Ylber dhe Albrim Fana u zhvillua në Prizren, ndërkohë që kronika e mëposhtme vjen nga TV-Prizreni.
Sipas këtij televizioni, të martën janë nderuar dëshmorët e kombit, Ylber dhe Albrim Fanaj. Dëshmorët kanë rënë heroikisht në luftë me forcat okupatore serbe në kufirin shqiptaro-shqiptar në vitin 1998. Familjarë, bashkëluftëtarë, veteranë e invalidë të luftës, qytetarë dhe përfaqësues të institucioneve lokale në Prizren, të martën me nderime në varrezat e dëshmorëve në Landovicë, në 20 vjetorin e rënies, kanë përkujtuar trimat e lirisë, Ylber e Albrim Fanaj nga Vërmica.
Nënkryetari i komunës, Eshref Memaj, tha me këtë rast, se dëshmorët edhe pse në moshë të re, u kyçen pa hezitim në radhët e UÇK-së për çlirimin e vendit, duke vazhduar traditën e atdhedashurisë së të parëve të tyre. Sekretari i degës së OVL të UÇK-së në Prizren, Isa Berisha, gjithashtu vlerësoi jetën dhe veprën e dëshmorëve, të cilët u flijuan në lulen e tyre të rinisë në shërbim të atdheut, duke qenë ndër dëshmorët e parë në zonën e Prizrenit.
Ndërkaq, ish komandanti i brigadës 128-të Zonës Operative të Pashtrikut të UÇK-së, Ruzhdi Saramati, kishte një shqetësim të cilin ia drejtoi bashkëluftëarëve, të cilët nuk po marrin pjesë në përkujtimin e shokëve të tyre të luftës të cilët ranë në altarin e Lirisë, sikurse janë edhe dëshmorët, Ylber e Albrim Fanaj, të cilët në përpjekje për të sjellur armatim në kufirin ndërshqiptar, deri në fishekun e fundit luftuan kundër armikut gjakatarë.
Kushëriri i dëshmorëve, Malush Fanaj, edhe vet ish pjesëtar i UÇK-së, tregoi për momentet e këmbëngulësisë së Ylberit dhe Albrimit, për t’iu bashkuar radhëve të ushtrisë çlirimtare për t’i dal zot atdheut, duke mos kursyer asgjë nga vetja deri në flijimin e tyre për në pavdekësi. Dëshmori Albrim Fanaj, kishte rënë në fushën e nderit pak para se të mbushte 20 pranvera, ndërsa një vit më i ri se kushëriri i tij ishte dëshmori, Ylber Fanaj./tvprizreni.com/
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA