YLBER DASHURIE
A e keni parë ullirin të digjet
Kercëllimën e vajit mbi një enë
Rrokullimën e djersës kur nga balli bie
Muskujt e tendosur si varg poezie
Ata dy sy që shpojnë yjet
, dhe Trupin ma përshkrojnë çmendurisht
E gastartë me qafën time mjellmë
Ndër dhëmbë kafshoj heshtjen e trisht
S’ka më të bukur se ai djalë
Kur kaqurrelat i zhdredhen ballit
I bulëzon kristal e njoma vesë
E shkëlzen i bardhë zambak
Mbi krahët e tij trembet vdekja
Lindin ylberë si jeta pas shiut
Kush nuk ka dashur e ska jetuar
Kot peshë e frymë i rëndon dheut
Me mbretërit pi…
Atëherë kur Gabriel lajmëtari
Do të sjellë lajmin që s’marr frymë
Unë s’dua t’më qash mua tek varri
Dua t’më kujtosh me gëzim !
Dua t’më kujtosh sytë që ndrinin
Për gjëra të vogla si shpëtimi i një breshke
Si vrap një lëndine kur mbinin
Apo këmbëzbathur mes një qyteti në ecje
Duhet ta dish se ka gjëra të veçanta
Si një gur zalli mund të bësh dhuratë
Mund t’i dhurosh vajzës ca luleshpata
me dikë vetmuar kohën kur ta ndajë
Mos qaj se ika më kujto i gëzuar
I lehtë do t’jetë dheu mbi kurmin tim
Atje ku bie akshami i pashuar
Me mbretërit në një gotë do të pijmë
Gdhendje…
Mjerisht si çdo grua unë jam mëkatare
Me ngjyrë të purpurt i dua mëndafshet
Smeraldet e gjelbërt rubinet prej gjaku
Floririn që gdhendet me djersë ciraku
S’di në ka diç tjetër fort më të bekuar
Kraharor prej gruaje, që të bën të dridhesh
Kaltërsi prej sysh, kur derdh ngjyrë zafiresh
Zemra e një burri nuk ka kurrë të çmuar
Si është burri që dua ?
Si një fëmijë i lumtur
Që do të tregojë Me sy,
duar, fjalë
Çdo gëzim,
Që i lumturon shpirtin.
Më tregon për qenin Për trikon,
Që e vesh mbrapsht
Për njollën, që i ra në bluzë
E më duhet, T’i mbyll gojën me duar
T’i them:
Hesht se më çmende!
Pikërisht atë cast
Ai më puth…,
Ndjej të qeshurën e tij,
Si tigull i ëmbël violine
Të mbushë ajrin mes nesh.
Flutura ylberi,
Me aromë borzilok
I mbeshtjellin gojën,
Ngadalë ai m’i lëshon qafës
Dhe rend trupit tim
Ngado ulen ato …
Si mund të mos e dua,
Një burrë si ai?
Shën Gjon…
Gjon ra mbrëmja sonte
Ku do të pagëzosh, apo je përgjumur
Në cilin ballë i bën kryq kësaj
bote Parajsën për ta humbur?
Është Madalenë që qesh
Apo një Mari e bekuar?
Ç’lutjesh i thua në vesh
Ty që ajo të ka besuar?
Shën Gjon, i uruar
Sonte mësova lutjen
Që kam harruar… !
Mos!
Kërkoj një gomë
Të fshij gabimet
Ti më thua: mos!
me sytë në dritë
Gur pas guri
Janë ngritur muret
Gabim pas gabimi
Ke mësuar
Pa gabuar
A je prapë ti !?
Mos vuaj ….
Kur ia puth gojën të dashurit tim
Sytë e smeraldtë i bëjnë dritë
Ndaj unë e dua për atë vegim
Të blertë i ka, si hala në pishë !
Kush si Ai të puthë s’ka ditur
As fjalë të ëmbël s’pati si mjaltë
Në mijëra yje lindur e fikur
Askush si ai s’pat shpirt të bardhë
Oh gëzimplotë është i imi djalë
Si burimet e maleve ku është rritur
Më mbështjell krahëve si qilibar
Fryma i vjen si pjalmi i pishës
Dhe ndjej një fllad që ndizet zjarr
Si ujë burimi kur merr hov mali
Flaka s’më tremb dhe vrapin e marr
Në pikla vese buzëqeshet fati!
Si mund të ndalem pa e dashur
Kur ai më thotë veç veten duaj
Nëse një ditë ty të lëndoj
Më hidh në lum veç ti mos vuaj.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA