Nëpër faqet e “Gjurmë Shqiptare”, botim i Lidhjes së Historianëve Shqiptarë më seli në Zvicër
Zonja ime Medvegjë!…
Tokë Ilire, tokë e cila lindi gra dhe burra trima, heronjtë e pavdekshëm si Veli Dedi, Zenel Hajdini, së fundi Florim Rushiti e shumë të tjerë i njeh historia vet, intelektual të shquar me të cilët mburret i gjithë kombi shqiptar siç ishte Akademik Idriz Ajeti dhe shumëçka tjetër, me shumë të drejtë të takon epiteti “Heroinë”.
-Vështrim i shkurtër rreth historikut të Medvegjës-
Kur flasim për trojet shqiptare duhet kujtuar Mollën e Kuqe, trungun Iliro Dardan, sot të lënë pas dore padrejtësisht jashtë djepit të saj.
Sipas këndvështrimit historik në lashtësinë e saj Medvegja ka qenë e banuar nga fisi Ilir i Dardanëve.
Etimologjia e saj daton nga lashtësia, ka kaluar nëpër disa epoka nga IDIMUM, MEDOKA e sot Medvegjë.
Ekzistojnë gjurmë arkitektonike për rreth qytetit të cilat datojnë nga shekulli 4 i epokës së re në kohën kur ishte pjesë e Perandorisë Romake, Mevegja njihej me emrin Idimum.
Në kohen e Perandorisë Osmane deri në vitin 1878 mendohet se osmanët Medvegjën e quanin Medoka .
Me 1878 regjioni i Medvegjës iu dorëzua Serbisë, si pasojë e luftës Serbo-Osmane dhe Luftës Ruso-Osmane ku osmanët pësuan disfatë dhe dorëzuan shumë territore në Ballkan dhe Europë Lindore.
Gjatë viteve 1877-1878, kur u dëbuan shqiptarët nga Sanxhaku i Nishit, shumica e popullsisë serbe zuri pjesën më të madhe të Medvegjës. Historia na mëson se partizanët Jugosllav pasi okupuan qytetin në vitin 1944 vranë rreth 200 banorë.
Medvegja e sotme gjendet në Lindje të Kosovës, sipas Sëbisë në sërbinë jugore e cila administrohet nga Sërbia. Në Jug-perëndim kufizohet me komunën e Prishtinës; në Jug me komunën e Dardanës; në Veri-perëndim kufizohet me komunën e Bojnikut,në Veri e Lindje me komunën e Lebanës dhe në Perëndim kufizohet me komunën e Kurshumlisë dhe komunën e Besianës
Komuna e Medvegjës me fshatra e veta dikur ishin të banuara 100% me shqiptar, sot Medvegja numëron më pak se 500 banorë shqiptar.
Medvegja e vogël me figura të mëdha kombëtare.
“…Kush hesht s’ka nder, e unë s’mund të hesht, dua të flas shqip, të jetoj shqip, të vdes shqip…Bafti Krasniqi”
Këto fjalë madhështore nga i madhi i pavdekshmi mësuesi i popullit Bafti Krasniqi, flasin gjuhën e shpirtit të vuajtur me shekuj, flasin shumë për atdhedashurinë, etjen për dije, guximin e pashtershëm për tu ballafaquar me sfidën dhe sakrificën në realizimin e misionit të shenjtë prej mësuesi.
Vërtet janë të pakta fjalë të cilat mund të përkufizojnë veprimtarinë e figurës të ndritur të mësuesit tonë medvegjas Bafti Krasniqi.
Dashuria për atdheun, gjuhën dhe kulturën shqipe ishin hija në formimi e personalitetit të tij prej një intelektuali dhe atdhetari të shquare të komunës së Medvegjës.
Puna dhe angazhimi i tij në arsimin shqip në Medvegjë la gjurmë të pashtershme. Një njeri i me pamje qet por me shpirt luani, u ballafaqua me peripecitë e kohës në të cilën jetoi, pavarësisht çdo gjëje ai arriti të realizoj synimin e tij dhe misionin e mësuesit në edukimin dhe arsimin e brezave në gjuhën shqipe. As rrethanat e asaj kohe të diktuara nga regjimi serb nuk ia ndalën rrugën në realizimin e synimit shqip. Ishte mësuesi i pari që zhvilloi mësimin në gjuhën shqipe në këtë trevë, pa pyetur autoritetet. Plan programin e siguronte nga Hogoshti fshat në Kosovë, të cilin vetëm vija kufitare e ndan me Medvegjën.
Ky ishte Bekimi, i bekuar nga vet Perëndia, urtësia, guximi dhe intelekti, elemente kyçe aq mirë të gërshetuara njëra me tjetrën në formimin e personalitetit të figurës së tij të ndritur.
Është i pari mësues i cili hapi mësimin në gjuhën shqipe për klasën e pestë në Banjë të Sijarinës, fshatë në Medvegjë, pastaj hapi mësimin shqip për klasën e parë dhe të pestë në në Medvegjë.
E gjithë jeta e tij është përkushtimi i tij në arsimimin shqip të popullatës së Medvegjës, prandaj populli e quajti me epitetin “mësuesi i popullit” në shenjë mirënjohjeje për kontributin e dhënë deri në vdekje.
BAFTI KRASNIQI, MËSUES I POPULLIT 1937 – 1983
Bafti Krasniqi u lind në lagjen Vllasë të fshatit Gërbac të Medvegjës në një familje të varfër por atdhetare. Shkollën fillore katërvjeçare përfundoi në gjuhën serbe në fshatin Ramabajë, më pas mësimet i vazhdoi në gjuhën shqipe në Hogosht. Në shtator të vitit 1954 në fshatin Gërbac, Baftiu fillon të punoj si mësues i parë me mësim në gjuhën shqipe në tërë trevën e komunës së Medvegjës. Në Lisockë të Kamenicës punoi si mësues gjatë viteve 1956-1957. Në vitin 1963 regjistrohet në Shkollën dyvjeçare të Normales së Gjilanit, të cilën e përfundoi me sukses.
Në fshatin Gërbac, punoi si mësues deri në vitin 1971. Nga posti i mësuesit më vonë kaloi në Medvegjë, ku punoi si përkthyes, referent për çështjen e arsimit në Medvegjë. U angazhua për hapjen e mësimit në gjuhën shqipe, për herë të parë në komunën e Medvegjës, gjë që e arriti në vitin 1976, me hapjen katërvjeçares së plotë. Bafti Krasniqi ishte edhe nënkryetar i Komunës së Medvegjës. Pas shumë peripecive dhe me gjithë refuzimin e organeve komunale që të ketë shkollim të mëtutjeshëm në gjuhën shqipe, megjithatë ia doli që ta hapë për herë të parë edhe klasën e pestë me mësim në gjuhën shqipe. Pas këtij angazhimi kombëtar për dituri e përparim të shqiptarëve të kësaj treve, atë e përjashtuan nga ish-Lidhja Komuniste, në shenjë pakënaqësie nga pushteti për angazhimin e tij kombëtar.
Bafti Krasniqi vdiq i ri në moshë, por pas vete la veprimtarinë e tij të pavdekshme e cila rron dhe do të rroj dhe do të kujtohet përherë me shumë respekt nga të gjithë ata që e njohën dhe brezat e ri të cilët mësojnë dhe do të mësojnë për kontributin e tij fisnik dedikuar arsimit shqip në Medvegjë.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA