….. ishte një vajzë me flokët e arta si gruri i fushave në gusht, flokë të drejtë që i preknin supet e brishtë, (akoma sot e kësaj dite nuk e di përse i thoshin flokë presh dhe jo thjeshtë të drejta) sytë i ndriçonin si llambushka drite, buzëqeshja i hijeshonte fytyrën, veshja e saj asokohe ishte një përparse shkollë e zezë, trikoja e leshit të dhisë, (lesh kmene si i thoshin vendasit ne ate qytet te vogel verior), e që kur e prekje, të therte dorën. Në dimrin e ftohtë Maria ecte në këmbë nga fshati i saj Jezull, që ishte pranë atij qyteti, për të ardhur në shkollën fillore, në qytet. Në ditë dimri shiu i rëndonte trikon e leshit dhe çizmet e llastikut që shkelqenin, i kishin futur ujë nga disa çarje te vogla dhe që ja mbanin këmbët akull te ftota.
Tutat e saj futur në çizme, e mbanin këmbën po aq të lagur. Vinte në klasë e bërë qull e tëra, dhe mësusja e vinte afër sobës me dru që kishim në klasë. Avujt që ngriheshin nga soba ja fshihnin pothuaj fytyrën e zbehur nga i ftohti. Maria kishte një buzëqeshje te shkëlqyer ne fytyrën e saj, sikur të donte ti bënte sfidë gjithë tablos se trishtuar, kishte një të folur me zë të ulët tē kujtonte ikonat dhe emri i saj të kujtonte shën Marinë, por që në atë kohë ndoshta isha nga të paktët fëmijë qe kisha këto parafytyrime tē ndaluara për kohën, kohën e djallit që kishim fatin ta jetonim.
Sikur mos i kishte mjaftuar vuajtja e ditës me rrobat e lagura, çdo ditë e gjeja në drekë tek rradha e bukës së qytetarëve, duke ju lutur njerzve “a ma merr nji bukë”. Maria ne fshatin e saj duhet te hante bukë misri edhe se prindërit e saj prodhonin grurë, por Maria nuk kishte të drejtë te blinte bukë gruri ne qytet. Ky mendim më mundonte gjithmonë por nuk e zgjidhja dot me mendjen time të vogël.
Ishte vetë Maria që e kishte zgjidhur këtë situatë, vetëm me buzëqeshjen e saj si sfidē për të gjitha vuajtjet, ndaj jam e bindur që ajo ja doli mbane të shihte ditët e bukura me diell, e të blinte bukën që preferonte, por buzēqeshja i mbeti në fytyrë, si një dëshmi zemre nga e cila buronte shpresë e dashuri për jetën ….!!!
…ishte viti 19…..
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e “pirustinews.com”, në të kundër çdo shkelës do të mbajë përgjegjësi sipas nenit 179 të ligjit 39/2016”