Shkëndijë
—————
Cigarja ime digjet gacë së ndezur,
tymnon shtëllunga ngushëllimesh,
filtrin e saj buzës së reshkur
ia puth e thith, i përhumbur mendimesh.
Ajo përndizet, e shkurtohet,
por helmi i saj nuk më helmos
se i helmatisuri nuk helmoset
kur gjakun e ka: katran e blozë.
Fiket një, e ndez një tjetër,
flakë çakmaku dua të shoh,
hi të djegur – gazë të ndezur,
e le të përdigjem nëpër kohë…
E le ta shkruaj dhe një varg,
e le të zhytem në të ardhme,
e le të mbyllem, të ik larg,
e le tymnajës të shoh sharme!…
E le ta hap një shteg të ri,
e le ti harroj që të gjitha,
e le të digjem n’k’të zjarrmi,
e le të kujtoj atë që isha.
E le të kujtoj një ëndërrimtar,
si një vegim, si atraksion,
si një flakë që digjet nëpër zjarr,
në përdëllim, në perfeksion…
E le të besoj atë që dua,
atë që jetës do të më vijë,
ç’rëndësi ka ç’u përcëllua
kur cigare e re pret një shkëndijë?!…
Andris Lleskai
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA