Në Shkollën e Mesme Profesionale “Shën Jozefi Punëtor” në Rrëshen u organizua një ceremoni e veçantë për shpërndarjen e dëftesave dhe çertifikatave të nivelit, ku moren pjesë drejtues dhe përfaqësues të ZVA Mirditë, ZP Mirditë, kryetari i DHTI Tiranë Nikolin Jaka, biznesmenë si edhe prindër e nxënës.
Drejtori i Shkollës Michele Leovino theksoi se të jesh drejtues i një shkollë të tillë si “Shën Jozefi” është një privilegj. Sot këta nxënës përmbyllin studimet në një ndër nivelet e arsimit profesional. Të gjithë jemi angazhuar, kemi bërë maksimumin tonë, por synojmë të gjithë së bashku diçka më të mirë.
Kryetari i DHTI Tiranë Nikolin Jaka vlerësoi edhe sakrificen e prindërve për të sjellë fëmijët që të marrin dije në këtë shkollë me dashuri dhe besim. Jaka u ndal edhe në bashkëpunimin 5- vjeçar të DHTI Tiranë, shkollës dhe Dhomës së Zejtarisë të Dortmundit.
” Ju sot çertifikoni njohuritë tuaja në një profesion, dhe sipërmarrjet private ju presin krahëhapur, pasi ata kanë nevojë për persona të përgatitur profesionalisht si ju. Rruga e duhur nuk është punësimi jashtë vendit por arsimimi dhe integrimi në sipërmarrjet vendase”, theksoi Jaka.
Me të njëjtin mesazh iu drejtua nxënësve edhe përfaqëduesja e ZVA Mirditë Valbona Beleshi, e cila vuri theksin në bashkëpunimin e vazhdueshëm me shkollen ” Shën Jozefi” dhe vlerësoi rolin e kësaj shkolle në aftësimin profesional të të rinjve.
“Qëndroni në Shqipëri, punoni në vendin tuaj pasi shoqëria jonë ka nevojë për të rinj profesionistë si ju, apeloi Beleshi.
Ndërkohë Drejtori i ZP Mirditë Erion Nikolli u uroi suksese nxënësve, të cilët sipas tij mund të japin kontributin e tyre në zhvillimin e vendit tonë.
Sipërmarrësi i njohur Ylli Ujka nënvizoi faktin se një prej sektorëve të sipërmarrjes së tij drejtohet nga një ish – nxënës i kësaj shkolle. “Ky është vetëm fillimi, pasi bashkëpunimi do të vazhdojë” deklaroi Ujka.
Ndërkohë mes Shkollës “Shën Jozefi” dhe DHTI Tiranë u rinovua marrëveshja e bashkëpunimit midis tyre.
Lindita Kokaj
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e “pirustinews.com”, në të kundër çdo shkelës do të mbajë përgjegjësi sipas nenit 179 të ligjit 39/2016”