Nga dr. Xhovalin Leka
Në kujtesën e Mirditës, ndër emrat që nuk veniten kurrë, qëndron i gdhendur thellë ai i Dr. Agim Qarrit, kirurgut që jetoi dhe punoi me dinjitet, me guxim dhe me një përkushtim të rrallë njerëzor. Ai ishte një mjek, një profesionist i aftë; ishte një shtyllë besimi, një dorë shpëtimi, një zemër e madhe që rrihte për jetën e të tjerëve.
Mirdita, një krahinë e punës së rëndë dhe e sakrificave, një trevë e minierave dhe e aksidenteve të shpeshta, e njohu Dr. Agimin në ditët më të vështira. Në sallën e kirurgjisë së Spitalit të Rrëshenit, ai u bë garancia e fundit mes jetës dhe vdekjes. I vëmendshëm, i qetë, i përkushtuar deri në orët e vona të natës, ai mori përsipër ndërhyrje të rënda, operacione të organeve jetike, çaste ku duhej të ishe më shumë se mjek: duhej të ishe njeri i guximshëm. E pikërisht këtë ishte Dr. Agimi. Një kirurg që nuk e njihte frikën, që nuk tërhiqej para sfidave, që nuk mbyllte derën asnjëherë për asnjë pacient që hynte në pavijonin e kirurgjisë.
Ai “u shkri” me mirditorët, siç thuhet me atë fjalën tonë të bukur që nuk ka përkthim të saktë. U bë i tyri, i familjes së tyre, i ditëve të mira dhe i netëve të trishta. Mirditorët e panë të punonte krah mjekëve të tjerë të spitalit të Rrëshenit, duke u kthyer në shembull profesionalizmi për shumë të rinj që u rritën në atë mjedis pune e sakrifice.
Më vonë, Dr. Agimi u transferua në Tiranë, por Mirdita e mbajti mend gjithmonë. Ai nuk u harrua kurrë, sepse nuk harrohet njeriu që të ka shpëtuar jetën, njeriu që ka ndezur një dritë në çastet ku gjithçka dukej e errët.
Fundviti 1989 i mori vendit një nga mjekët më të mirë. Helikopteri që po transportonte të plagosurit e aksidentit të Himarës e Llogarasë u rrëzua, duke marrë me vete mjekët, personelin ushtarak dhe pilotët. Midis tyre ishte Dr. Agim Qarri, së bashku me kolegen e tij, Zana Floqin. Ishte një humbje e rëndë, jo vetëm për familjet, por për gjithë mjekësinë shqiptare.
Kujtimi i tij lidhet edhe me humbjet e tjera të mjekëve që ranë në krye të detyrës, si rasti i fundit i Dr. Sandër Balojit, bir i Oroshit, që jetën e dha për të shpëtuar një jetë tjetër. Të gjitha këto histori, së bashku, janë fijet e forta të humanizmit shqiptar. Ato na kujtojnë se mjekët tanë, përtej pajisjeve e sallave të thjeshta të atyre viteve, punuan me shpirt të madh, me atë frymë që lidhet me veprën e Nënë Terezës, vlerë e shenjtë ekumenike për botën, por etnike për ne shqiptarët, sepse në zemrën e saj rrihte gjaku ynë.
Në këtë histori nderimi nuk mund të mos përmendet edhe bashkëshortja e Dr. Agimit, Reshela Qarri, mësuese shembullore e Gjimnazit të Rrëshenit. Ajo ishte dritë e qetë në arsim, ndërsa ai ishte dritë e guximshme në mjekësi, një çift që la gjurmë në shumë jetë.
Në këtë rrëfim nderi hyn edhe emri i Aleksandër Balojit, mjek i ndritur i QSUT-së, biri i gazetarit të shquar Prengë Baloj, që po ashtu humbi jetën në krye të detyrës, duke zgjatur dorën e fundit të shpëtimit te një i sëmurë.
Dr. Agim Qarri nuk është vetëm një emër i së kaluarës.
Ai është një kujtim i gjallë për të gjithë ata që e njohën.
Është simbol i një brezi mjekësh që punuan me nder, me dashuri për njerëzit, me përkushtim të pakushtëzuar human. Në Mirditë, në Lezhë, në Tiranë, emri i tij pëshpëritet me respekt: si kirurg i shkëlqyer, si njeri i mirë, si hero i heshtur i një kohe kur jeta duhej shpëtuar me zemër para se me mjete. E tillë është vlera e tij: e ndritshme, e pastër, e pashlyeshme.
I paharruar qoftë kujtimi i Dr. Agim Qarrit!
Me shume rreth kesaj teme ne Pirusti News:
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA