Nga YONKERS, NEW YORK,
Aleksandër NDOJA
Mirdita nderon senatorin amerikan David J. Tubiolo: Mirënjohje për miqësinë dhe mbështetjen ndaj shqiptarëve të Yonkers
YONKERS, NEW YORK – Historia e Mirditës, miqësia me shqiptarët dhe lidhjet e komunitetit me përfaqësuesit e jetës publike amerikane ishin në qendër të një takimi të veçantë në Yonkers. Akademia e Artit, Shkencave dhe Letrave “Mirdita” i akordoi senatorit amerikan David J. Tubiolo çmimin e lartë të mirënjohjes “APPRECIATION OF MIRDITA”, në shenjë vlerësimi për kontributin, mbështetjen dhe bashkëpunimin e tij të vazhdueshëm me komunitetin shqiptar.
Ceremonia bashkoi rreth kësaj mirënjohjeje drejtuesit e Akademisë “Mirdita”, Pjetër Markun dhe Aleksandër Ndojën, veprimtarin e komunitetit shqiptar Mark Qehaja, si dhe avokatin Nikoll Kola.
Një nga momentet më të veçanta të takimit ishte fjala mikpritëse e senatorit Tubiolo, i cili shfaqi njohuri mbi historinë e Mirditës dhe ngjarjet që kanë shënuar këtë trevë ndër shekuj. Komunikimi i tij, pjesërisht në gjuhën shqipe, i dha takimit një dimension të veçantë njerëzor, duke pasqyruar afërsinë dhe miqësinë e tij me shumë shqiptarë të Yonkers.
Bisedë për historinë, kulturën dhe bashkëpunimin
Përtej dorëzimit të çmimit, takimi u shndërrua në një bashkëbisedim me vlerë mes drejtuesve të Akademisë “Mirdita” dhe senatorit amerikan. Shkëmbimi i mendimeve për historinë dhe trashëgiminë kulturore të Mirditës, si dhe për marrëdhëniet me komunitetin shqiptar, i dha këtij takimi një rëndësi të veçantë.
Senatori Tubiolo i pranoi me kënaqësi edhe tri revista “Mirdita”, të cilat iu dhuruan si një tjetër mënyrë për të ndarë me të historinë, kulturën dhe identitetin e kësaj treve shqiptare. Ai shprehu falënderimet për takimin surprizë, të organizuar nga Mark Qehaja, veprimtar i angazhuar prej vitesh në komunitetin shqiptar në Queens dhe në hapësira të tjera të diasporës shqiptare në SHBA.
Çmimi “APPRECIATION OF MIRDITA” iu akordua senatorit me motivacionin:
“In recognition of your valuable contributions, unwavering support, and continued collaboration with the Albanian community of Yonkers. With gratitude for your friendship, dedication, and enduring commitment to our community.”
Në shqip: “Në vlerësim të kontributeve tuaja të çmuara, mbështetjes së palëkundur dhe bashkëpunimit të vazhdueshëm me komunitetin shqiptar të Yonkers. Me mirënjohje për miqësinë, përkushtimin dhe angazhimin tuaj të qëndrueshëm ndaj komunitetit tonë.”
Për Akademinë “Mirdita”, ky vlerësim përfaqëson më shumë se një ceremoni simbolike: ai shpreh mirënjohjen për lidhjet e krijuara me komunitetin shqiptar dhe për rëndësinë e miqësisë, bashkëpunimit dhe ruajtjes së identitetit kombëtar në diasporë.
Takimi në Yonkers përcolli një mesazh të qartë: kultura dhe historia shqiptare mbeten ura të rëndësishme komunikimi, miqësie dhe bashkëpunimi mes shqiptarëve dhe shoqërisë amerikane.
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA