– Opinion i botuar në Tirana Observer – ARKIVE
13 shtator 2013
Edhe pse kanë kaluar mbi dy muaj nga përfundimi i zgjedhjeve parlamentare, për shumicën e zgjedhësve rezultati, i cili çoi në opozitë PD-në dhe aleatët e saj, nuk përbën ndonjë surprizë të madhe. Kjo sepse situata e rëndë në funksionimin e qeverisjes nuk donte shumë mund për t’u identifikuar, ajo ishte e prekshme në çdo qelizë të jetës. Madje, edhe një pjesë e madhe e të larguarve nga pushteti kanë filluar të kthjellohen dhe po pranojnë gjithnjë e më shumë se rrotacioni ka qenë një domosdoshmëri.
Por shumë “analistë” të së djathtës akoma nuk pranojnë se arsyet e vërteta të humbjes së tyre në Mirditë janë pikërisht ato arsye të humbjes së PD-së në të gjithë Shqipërinë, por edhe ndonjë element tjetër specifik si shtesë. Ata nuk duan ta pranojnë, por faktet tregojnë se Berisha, indirekt apo direkt, prezantoi një vijë sjelljeje tipike hakmarrëse apo urrejtje në Mirditë dhe me mirditasit.
Janë shumë argumenta që e provojnë këtë, por njëri prej tyre akoma has në mospranim fakti, e që lidhet me arsyet pse qeverisja në ikje për tetë vite me radhë përdori një fshesë të hekurt ndaj çdo mirditasi në nivelet e qeverisjes, aq sa asnjë emër të tillë nuk mund të konstatoje në nivel ministri, zv.ministri, drejtor drejtorie apo edhe në nivele të tjera edhe më të ulëta.
Të zënë në këtë çark disa “opinionistë” kundërshtues, për të justifikuar sjelljet 8-vjeçare të Berishës, thonë pa hezitim se ai, Saliu, kishte të drejtë në këtë mënyrë sjelljeje, pasi mirditasit janë treguar të pabesë me të, duke përdorur si argument të vetëm rastin “Zef Brozi”.
Sipas këtyre analistëve, Sali Berisha e çoi Brozin në detyrën më të lartë të shtetit, në postin e kryetarit të Gjykatës Supreme, që në atë kohë njihej si Gjykata e Kasacionit, por ai i doli kundër me vijën e sjelljes së tij pasi mori këtë detyrë.
Edhe pse ky argument ka rreth 18 vite që përdoret, mburoja e sajuar me këtë rast është kthyer në një llamarinë tejet të ndryshkur, aq sa përdorimi i saj në kohë të gjatë është thjesht të gjesh një argument, sado që është i pavërtetë, por mbi të gjitha të mos kesh asnjë vizion.
Në logjikën e këtyre mjeranëve i bie që mirditasit e djathtë qenkëshin të pabesë, (gjë që nuk është aspak e vërtetë) pasi me dhjetëra figura të tjera mirditase gjatë pushtetit të së majtës prekën majat e qeverisjes dhe nuk u treguan “të pabesë”.
Në fakt, Zef Brozi hyri në politikë shumë herët, në vitin 91, si pedagog i drejtësisë, duke u rreshtuar në krah të ndryshimeve demokratike. Në zgjedhjet e vitit 1992 ai mori mandatin e deputetit të Mirditës, në emër të Partisë Demokratike.
Pas kësaj, politikisht u tregua po aq i besës me Berishën, duke votuar çdo ligj të asaj qeverisjeje, madje duke i shpifur se ka shpikur të vetmen akuzë me të cilën mund të burgosej kreu i opozitës Fatos Nano, akuzën e shumëdebatuar “për përfitim në favor të palës së tretë”, pasi asnjë argument nuk qëndronte për përfitim të drejtpërdrejtë, aq më tepër kur bëhej fjalë për arka me lëng dardhash apo mollësh, sjellë nga një kompani italiane në formë ndihmash, e njohur me emrin “Levante Co”.
Po kalimi i Brozit në detyrën e kryetarit të Kasacionit e çonte në tjetër pozicion, jo më në atë të politikani akuzues, por në profesion ligjor, pedagog i së cilës kishte qenë prej shumë vitesh, pra aty ku kërkohej “besë” në zbatimin e ligjit dhe Kushtetutës.
Se si rrodhën ngjarjet asokohe, për të gjithë opinionin janë të ditura, pasi “besëpreri” Zef Brozi, me një lëvizje spektakolare, u mor në besë, pikërisht nga Shtetet e Bashkuara të Amerikës.
Janë SHBA-të që, pas mbështetjes së madhe për demokracinë shqiptare, mbështetjes së pakufishme për forcat e para demokratike në vend që kryesoheshin nga PD-ja, mbanin sytë hapur dhe kishin filluar të shfaqnin dyshimet e para për deformime të rënda të demokracisë.
Ndoshta, për të mos vepruar hapur dhe për t’i ruajtur demokratët tek të cilët akoma kishin besim se mund të korrigjohen, amerikanët kishin drejtuar mesazhe për kreun e shtetit të asaj kohe, pikërisht përmes Zef Brozit gjatë dy vizitave të tij në SHBA.
“Inati” i PD-së me Brozin, inat me Amerikën apo besprerje me Mirditën
Pikërisht fenomeni Brozi duhet parë jo si ndryshim i vijës së sjelljes së Sali Berishës me mirditasit, siç predikon ditë e natë ky soj opinionistësh, por faktet e shumta tregojnë se Zef Brozi ishte pikënisje e një sherri të gjatë mes Berishës dhe amerikanëve.
Pikërisht në atë kohë Partia Demokratike nis serinë e sulmeve, ndonëse donkishoteske, ndaj SHBA-ve, kur bëhet fjalë me një fuqi aq të madhe të demokracisë botërore.
Të gjithë janë fokusuar për momentin tek deklaratat po aq donkishoteske të ish-kryetares së Parlamentit Jozefina Topalli, e ashtuquajtur “zonjë e hekurt”, të cilën vetë shkodranët, ditën që pjesën e “hekurt” të saj në mënyrë plebishitare e çuan për skrap në zgjedhjet e 23 qershorit.
Në mënyrë nervoze dhe të pakontrolluar, ambasadorin e Shteteve të Bashkuara të Amerikës, z. Aleksandër Arvizu, ajo e quan Brezhnjev të kohës së shkuar, madje nuk heziton të merret me gjatësinë fizike dhe ngjyrën e lëkurës.
Një deklarim i tillë mund të bëjë efekt te një pjesë obskurantiste brenda radhëve të klanit të saj në partinë ku militon, por nuk mund të bëjë aspak efekt në kombin amerikan, i cili problemet fizike apo racore i ka zgjidhur shumë herët, që në kohën e Martin Luther Kingut, ndërsa Shqipëria e epokës së Jozefinës vazhdon të bëhet gazi i botës, me sjelljet ndaj një kategorie njerëzish me ngjyrë që rropaten në metropol, me tenda në trotuare.
Por, edhe se opinioni është fokusuar në këto deklarata anti-Arvizu, nuk harrojnë se z. ambasador nuk është i pari që është vënë në sulmin e hanxharëve të PD-së.
Të gjithë kujtojnë sulmet dhe ironizimin ndaj ish-ambasadores amerikane Marisa Lino, të cilën guzhina mediatike e PD-së e krahasonte me Suden, duke iu referuar ngjyrës, por në fakt sulmet vinin për shkak të sjelljes së saj si përfaqësuese e demokracisë amerikane, larg të qenurit ushtare e PD-së.
Po ashtu, nuk është vështirë të kujtohen perversitetet shpifëse ndaj ambasadorit amerikan Jozeph Limpreht.
Jo më pak, guzhina mediatike e PD-së ka punuar kundër ish-ambasadorit amerikan Xhon Uidhers, duke i atashuar fyerje dhe sulme monstruoze, për të vijuar me ambasadorin aktual Aleksandër Arvizu, sulmet ndaj të cilit nuk janë vetëm nga Jozefina Topalli, por edhe nga eksponentë të tjerë të maxhorancës, e shndërruar në një minorancë super të tkurrur për katër vitet e ardhshme.
Edhe pse mundohen të bëjnë diferencën mes ambasadorëve me qeverinë dhe kombin amerikan, në më shumë se një rast përfaqësuesit më të lartë të shtetit dhe diplomacisë amerikane kanë saktësuar se ambasadorët kanë mbështetjen e plotë të qeverisë amerikane dhe në asnjë rast nuk kanë vepruar në kundërshtim me vijën që ndjekin Shtetet e Bashkuara të Amerikës.
Parë në këtë këndvështrim, për opinionin publik është krejt e paqartë se si këta politikanë, por edhe disa të tjerë që besojnë verbërisht te këta politikanë, i janë bashkuar korit të komunistëve kudo në botë, që as më shumë e as më pak prezantojnë të njëjtat sulme mediatike kundër SHBA-ve, në sintoni të plotë me këta zëra brenda PD-së së Shqipërisë.
Si është e mundur që janë kaq të verbër dhe nuk shikojnë se me këto sjellje të shëmtuara anti-ambasadorësh amerikanë, nuk bëjnë as më pak e as më shumë, por i bashkohen korit më antidemokratik në botë, që prihet nga ekstremistët talebanë dhe shumë lloj ekstremizmave të tjerë.
Kaq shumë u ka dhimbsur rrotacioni i pushtetit, aq sa nuk kontrollojnë dot instinktet e injektuara anti-amerikane, kur dihet çfarë Amerika ka bërë për shqiptarët, sidomos në fillim shekullin dhe fund shekullin e kaluar, me mbajtjen në këmbë të shtetit shqiptar dhe çlirimin e Kosovës, pa folur këtu për faktin se si kampion i lirive njerëzore në botë, ka një kontribut të çmuar në çrrënjosjen e komunizmit dhe vendosjen e demokracisë.
Aleksandër Ndoja
@2017 – Pirusti News. Te gjitha te drejtat te rezervuara.
“Të gjitha të drejtat e këtij materiali jane pjesë ekskluzive e patjetersueshme e “pirustinews.com” sipas ligjit nr.35/2016 “Për të drejtat e autorit” dhe të drejta të tjera të lidhura me to”.
Ndalohet kategorikisht kopjimi apo tjetërsimi etj, pa autorizimin e administratorit të “pirustinews.com”, në të kundërt çdo shkelës do të mbajë përgjegjësi sipas nenit 179 të ligjit 39/2016”.
Lejohet çdo shperndarje ne profile te ndryshme sipas deshires se gjthesejcilit qe e gjykon te arsyeshme.
Administrator
Aleksandër NDOJA